حقا انا معكم في معظم مآقلتوا ولي عودة بالتأكيد مع الردود ،،

لكن
تمنيت منكم تسليط الضوء ع المستهلك أكثر من تسليطه ع المطاعم
لأني ذكرت في موضوعي :

وجود هالكميه من المطاعم دليل ع وجود مستهلكين

المطآعم فيهآ السيء و فيهآ الجيد و هالشي غالبا يكون وآضح
لكن المشكله في المستهلك اللي يعتمد عليها و يبآلغ في ارتيادها
في الام لمآ تخلي اولادها يدمنون ع هآرديز و ماكدونالدز و غيرها م المطآعم ،،
مره او مرتين في الاسبوع نآكل م المطعم ماراح تكون مشكله لكن انك تعتمد عليها
هنا المشكله ،،


../~



أخوي سنآ ،، الحآيره ذكرت حآلآت و برضو طرح مآرد وضع العزوبيه
و انا ذكرت ايضا في موضوعي العزوبيه و اللي ترجع م الدوام متأخر ،،

مع احترآمي لك و لـ الحايره و مآرد ،،

بس هذي حآلات و ليست ضرورات ،،

العزوبي ../ مآ يقدر يطبخ بالبيت ؟!!
اللي تتأخر في دوامها ما تقدر تعمل حسابها م اليوم اللي قبل ؟!!
اللي تنآم لـ وقت متأخر او اللي مهمله بيتها < هذي ضروره !
الرفآله عمرهآ مآكانت ضروره ؟!!


× آتمنى نطلع بـ فآيده م الموضوع ان ما اوجدنا حلول
ع الاقل نسلط الضوء ع المشكله اللي هي في المستهلك
حنآ السبب في انتشارها و حنآ المتضررين منها

مرحبآ شينوو ../


بصرآحه المطآعم طلعت زي البقآلات كل حته ومكآن
تلقى مطعم وجنبه 3 مطآعم في صفه وحده وكلهم نفس الآكل يسوون

هههههههههههههههه ../ من جد مآ ادري ليه ،،
يآخي مآيتغآيرون


والنآس مغير بواري وطقآق ومصآدم علشآن شآورمآ ولآ همبرقر
والعمآل اللى يشتغلون خآصه بالآمكآن اللى فيهآ شموس زي الريآض ومآ جاورهآ
تلقآه معرق ويمسح وجهه ويجيب لك الطلب وآنت تتلذذ بالطعم عقب العرق
طيب غير الصور اللى شفنآها بالنت كيف يسآوُ الشآورمآ وغيرهآ من آكل وغيرهآ وغيرهآ

يآسآآتر ../ لآ عاد توصف يرحم وآلديك
هو فيه احد يعرق الايآم هذي

و الله في مطآعم من لبس العمآل اللي فيه المفروض مآحد يدخله بس مدري ليه العآلم كذآ ،،
مآفي اكل بالبيت

كآن في عبدالله فؤاد معجنات الناعوره كنت ايام الاختبارات يوميا افطر منه
و فيه جنبه فول مش معئول
عآد فول مش معئول مطيح عنده السواق اتآريه يسآوي فلافل مرآ حلوآآ
و بعد كذآ انآ ادمنت عليها

مرآ كنت اودي ماما المشفى عندها موعد وحنآ راجعين وقفت السواق عند فول مش معئول
عآد ماما شآفت شكل المحل من برآآ جآها انهيار ،، كيف تاكلين من هنآآ
قآلت انا بنزل اشوف ../ و نزلت قآلت ياليلى مقرف حتى اللي يسآوي الفلافل مش لابس
جونتيات

الزبده عبت رآسي لين كرهته

والا فلافله مآتتعوض


../~


انا من وجهة نظري تكون رقآبه على المطآعم بشكل يومي على العمآل
مكآن اللى يسآوُ فيه الآكل لآن فيه نآس مآ تخاف الله وكم وآحد تسمم بسب هالمطآعم

البلدية يجيك وآحد توه صآحي الصبآح يقآلك بيفتش على المطعم
يجيه العآمل ويعطيه كم كلمه حلووه وفطور مجآني لمدة آسبوع ويمشى


فعلا الرقآبه مقصره ../ وكذلك ما ننسى ان المسؤوليه الاولى و الاخيره ع المستهلك
و ارتياده لـ هالمطآعم و عدم الاهتمام به و توعيته من جآنب الاهل اولا ،،


الموضوع لو جلست آحسى لين بآسر زي هالوقت مآ خلصيت

منتفخ قلبك هآآ



يعطيك العآفيه ع التوآجد ،، نورنآ دوم


سلآم

يآهلآ و غلآ بـ الحآيره ../


ضرورة وجودهآ مانختلف عليه ،، لكن استهلاكهآ و الاعتماد عليها لين انتشرت بـ هالطريقه
هو المشكله ،،

انتي ذكرتي حالات او ضروف يقدر اصحابها تعديل اوضاعهم و الاعتماد ع الطبخ ،،
بِـ استثناء الضيوف اللي يجون فجأه فمآ لها الا المطاعم


بصراحة أنا من النوع اتعب حيل من الأكل برا ومع هذا
ما استغنى عنه,خصوصا ورق العنب

شفتي كيف ../ خلاس تعوديتي ،، عاد كلش الا سحتك
لآزم تنتبهين لهآ ..~
و ع طآري ورق العنب ،، لايفوتك ورق العنب اللي من روآبي الشآم
خقق


نظامنا في عائلتنا انو يوم الجمعه لازم الغداء من برا
أما العشاء مو دايم بس الغالب من برا
ادري انها مو صحية هالطريقة بس الكسل وما يسوي..


مرا او تنتين بالاسبوع تهون ،، اومآ غالبا العشآ من برآ
بصراحه انتِ دجه


في ذمتك مو الأكل من برا احسن من الكوفي الي كل دقيقه بالبيت


يآشيخه الكوفي حكآآآيه ../ حتى لما اروح المشفى ودي اقول لَـ الدكتور
حط كوفي في المغذي و بطيب


يسلمك ربي ع التوآجد الحلو ،، نوريني دوم


سلآم

اهلآ و سهلآ مآرد ../



الله يلعن الحاجة اللي حدتنا على المطاعم
بكل صراحة وبكل واقعية عيشة المطاعم غير صحية و غير نضيفة على الاطلاق لعدة اسباب

انا لما كنت بالقصيم عند اهلي ما عرفت شيء اسمه مطعم الا في مرات ناااااااااادرة جدا جدا
بس العزوبية لها دور وهي من عودتنا على المطاعم
رغم اننا نعرف مساوئها بس وش نسوي

اولا مافي حاجه ضروريه ../ و إذا كنت عزوبي بالعكس كتير عزوبيه يطبخون
اخوي يطبخ بشكل يومي و هو عزوبي ،،
في الـ Compound اللي حنآ فيه ؛ في شقه فيها اتنين اخوان عزوبيه ماشاء الله
يقول اخوي و لايعرفون المطاعم و في رمضان العام يرسلون لنآ فطور بعض الاحيآن
الطبخ مآهو كيميا معقده ولا يحتآج جهد خآرق ..~

وانت كتبت غير صحيه و غير نظيفه <~ و هآي اسبآب كآفيه لـ تتركهآ و تطبخ مشآن سحتك ،،





1 - المطاعم هدفها الربح المادي - وهذا يعني انه اهم شيء تمشي وجباتهم وتصل لاكبر قدر من الناس وللوصول لهذا الهدف يجب وضع اي محسانات ونكهات ومقبلات تجعل من وجباتهم شهية وذات نكهة مميزة حتى وان كانت هذه المحسنات على حساب صحة المستهلك ولكن على الامد البعيد
2-وضع كمية كبيرة من الزيوت فوق المعدل الطبيعي الذي نضعه لطعامنا في البيوت
وذلك لجعل الاكل صالحا لاكبر قدر من الوقت وكلنا نعرف مدى تأثر الزيوت على الصحة
3 - العمالة الوافدة

هي اولا و اخيرا مشآريع تجاريه و كمآ ذكرت انت هدفهآ مآدي ،،
المفروض معرفتنا بوجود المحسنآت و النكهآت الضآره بالصحه تشجعنا ع تركهآ ،،
ايضا بانسبه لـ الزيوت وخاستا الفآست فود و المشكله ان اسعارها رخيسه جدا و الكل يقدر
يتنآولهآ و هذا سآعد ع انتشارها ،،
امآ بالنسبه لـ العماله الوآفده فَـ حتى بالجرآيد و النت يجيبون صور تكره الواحد في الاكل مو بس
في المطآعم لكن مع كذآ ماحولك آحد ،،


يعآفيك ربي ع التوآجد الحلو ،، نور قسم الحوآرآت انت



سلآم

يآهلآ و غلآ بـ آنسآآم ../

ذكرتيني بأختي قبل كم يوم تقولي أنسام رحتي للمطعم اللبناني، وانا اقولها لا !
هي تشرح لي انه في اعلى الفندق في السطح ، يطل على المدينة وفيها جلسات والجو حلو بوفية والطباخ قدامك يطبخ ..

يآ سلآم ع الوصف ،، هاي المطآعم و الا بلآ

واللي قاهرني لما نطلع نتمشى الصباح على الساعه 7 او 8 .. ما احصل الى مخابز خبز تميس
او مثل ما يقولون (خبز خباز)ا وفول وعدس
،اتمنى احصل مخابز على مستوى مثل اللي كنت اشوفهم بالظهران .. صراحه جنان هذاك حتى الطلاب زحمه عليه ايام المدراس قبل مايروحن على مدارسهم .. ريحة الزعتر مع الخبز الحار ...اممم كنت اخذ معي للمدرسة للبنات بالبريك،


مو مخابز التميس و الفول و البوفيهآت مآشي سوقهآ ،،
مع انها غالبا تكون اقل مستوى من المطآعم لكن يمكن مشآن اسعارهآ ،،
الشي اللي تشوفينه بالظهرآن او الشرقيه اكيد مآراح تلآقينه بمكآن تآني


../~


مرحبا
عودة لموضوع المطاعم ،،
كثرة وجود المطاعم وقلة الطبخ في المنازل تسبب أزمات صحية للأفراد والأسر، وهذا الأمر يعود الى ان الطبخ في المنزل يختلف عن المطعم ،،

هلآ بك من جديد

وهذآ اللي انا كتبت الموضوع مشآنو ../ حنّآ المتضررين بالرغم من مخاطرهآ ،،
وحنّآ اللي ندعمهآ بـ كثرة التردد عليهآ ،،


لتوضيح الفرق:
في المنزل اللي بيطبخ عادة يكون من أهل المنزل، تضمن النظافة وتشرف على الطبخ بنفسك.

اما المطاعم بيكون اشخاص اجانب، ولا يسمحوا لك تدخلي مكان العمل والطبخ، ويستخدموا الزيوت بتكرار وبذلك تكون متأكسده وهذا له اضرار خطيرة على الصحة.هذا غير طريقة حفظ الاطعمه، والاهمال من قبل بعض المطاعم من ناحية النظافة واذا كان الطعام غير طازج يحفظ بطريقة غير سليمة!!مما يسبب تواجد البكتريا والجراثيم وتسبب التسمم عند اكلها

وهذه اضافه لـ اضرار المطآعم اللي المفروض تخلينآ نتجنبهآ ،،
و نحمي انفسنا و اهالينا منها ،،

ومن نآحية الاطفال فعلا ،، حتى اخوي نآدراً مآ يفطر و كل يوم يآخذ م البوفيه بطاطس مقلي
و متل ماقلتي يآثقلهآ ع المعده الصباح ،،


و الوجبآت السريعه سآر الكل مدمن عليها و خآستا ان اسعارها منآسبه لـ الغالبيه
و التوصيل لـ المنآزل و خدمة لـ اوقات متأخره


انا مش ضد المطاعم ، ضد سياسة استغلال صحة الناس

انآ بعد مش ضد المطآعم و وجودها ضروره لكن الاعتماد عليها مو ضروره
و انا ضد الغاء مسؤولية المستهلك من الضرر اللي يلقاه من هالمطاعم ،،



شآكره توآجدك انسآم ../ و جود اسمك و رآيك اضاآفه لـ الموضوع

اهلا و سهلا سنآ ../
12 سآعه فطور ،، يآالله المهم انك افطرت
عوآفي خييّ ،،


بالنسبه لـ اولاً ،،
مدري ليه تعتبرهآ ظاهره صحيه ،، خآستاً ان اسعارها ممكن تكون رخيصه كتير ،،
فـ ارتياد الناس لهآ و شرائهم منها مو بالضروره تكون دلاله ع ظآهره صحيه ،،
ومتل مآذكرت انت سآرت شي اساسي و في المناسبات ماحد يعترف بـ اكل البيت ..!!


من نآحية الاداره و التموين ،،
الكثير م الأمور الخآفيه ع المستهلك ،، متل ماقلت كتير اشياء يستخدموهآ ما يدري المستهلك
لاعن مصدرها ولا جودتها ولا حتى اليد اللي طبختها ،،
لكن البعض يجعل من واجهة المطعم و مستواه مقياس لـ هالامور وان كانت لا تمثل ذلك ،،

بالمقابل تجد مطآعم منظرها يوحي بـ عدم الاهتمام من هالجوانب ومع كذآ مرتاديها كتير ،،


التنآفس ،،
هي اولاً و اخيراً مشآريع تجاريه ،، الربح المآدي هو هدفها ،،

بالنسبة لي انا احاول بقدر المستطاع تجنب هذه المطاعم ..

هذآ هو ،، لآزم ماننسى انو نحنا مسؤولين عن انفسنا و اولادنا اولا و اخيرا ،،
واذا المطاعم بتضرنا فـ نحن ع درآيه كآفيه بمآ تحمله من اضرار ،،
ويآليت مانغيّب هالجآنب و نلقي اللوم كله ع المطآعم


سنآ ../ مآشآء الله عليك ،، ردك موضوع بحآله ،،
شآكر توآجدك الغآلي

أهلآ و سهلآ زهره ،،

المطاعم كثيرة صحيح ولها ناسها وتطورت تطور كبير لدرجة ان اللي فيه سكر وضغط ممكن يطلب من المطاعم المتخصصة ولكن تكون الوجبات غالية شوي

صدقتي خيّه ،، وهالنقطه يمكن تُحسب ايجابيه لـ المطاعم في توفير الوجبآت الصحيه ،،
او لِـ متبعي نظام غذآئي معين ،،

للناس ظروفهم اللي تحدهم على المطاعم في عصر السرعة وعدم وجود الوقت للوقوف بالمطبخ كم ساعة على سبة مكبوسة ولا جريشة

الوقت كتير تغير و مآعاد الواحد يلآقي وقت حتى لِـ جلسه مع الابناء مآ ادري هي المشاغل
او عدم تنظيم الوقت ،، لكن الاكيد ان في مشكله وضروري يكون لهآ حل و المطاعم ان وفرت
لنآ الاكل بيكون جآنبه سلبيات متل الضرر الصحي و هذا غير الصرف المآدي ،،
هذآ غير ان المطآبخ مابيسير لهآ لزمه مع اعتمادنا ع المطآعم

من تجربتي الشخصية وفرت كل المواد اللي ممكن نطلبها من المطاعم من همبرجر وناكتس وشبس وكاتشب والصلصات وعبيت الفريزر وقلت بدل الطلب نسويه في البيت س بصراحة وقفة المطبخ والادخنة والروايح خلتني اغير راي وارجع للمطاعم لكن بحدود ومو اي مطعم وتفضل المطاعم الساخنة مثل الفطاير والبيتزا
احس حرام نضيع الوقت على عمل الوجبات ولف المحاشي وهي جاهزة وحلوة وسعرها مقبول
لكن مسحيل اقرب من المطاعم اللي زباينها من الوافدين لانها باعتقادي زحمة ومو نظيفة

أحترم رآيك و وجهة نضرك اللي صورة الوآقع بـ حقيقته ،، و اغلبنآ ع هالحال ،،
الله يحفضك و الجميع ان شآء الله ،،


اسعدني توآجدك ،، رآيك الواقعي اضافه لِـ الموضوع ،،
نورتِ زهرة